Poesia di Ferdinando Russo
'A passione
Màlia s'è mmisa cu nu mammamia,
nce sta perdenno salute e denare...
E fosse niente si n"a vattarria!
ma chillo 'a vatte, m'ha ritto 'o cumpare.
Dice c'a fa murì! Meglio sarria!
Io, si foss'essa, me jettasse a mmare!
Cierte sservizie nun 'e suffrarria...
Chillo 'a mbriaca 'e paccarune amare!
Cierti ffreselle, 'a sera, quanno vene,
dint' 'o vico, cantanno e traballanno,
mbriaco nfino 'a cimma d'' 'e capille!...
Ma 'intanto chella scema lle vo' bbene!...
e che credite ca se va lagnanno?
P'essa 'e schiaffe so' mmeglie d' 'e squasille.
Poesie napoletane di Ferdinando Russo
